èks sila te pibliye nan jounal Le Nouvelliste 26 jen pase a. Nou repibliye li.

Claude se te yonn nan premye moun ki te ranmase kout rèl Inivèsite Leta a te fè pou mete kanpe Akademi Kreyòl Konstitisyon 1987 la prevwa a.

Se te nan mwa oktòb 2008. VisRektè Rechèch la t ap louvri 12èm Kòlòk Etid Kreyòl ki t ap fèt nan peyi d Ayiti pou premye fwa. Li te tou pwofite branche patisipan yo sou kesyon Akademi Kreyòl la.

Claude annik tande pawòl la, li pa t pran tan pou l te fè nou konnen jan kesyon sa a enterese l. Li te tou ofri sèvis li pou ede fè lide a vanse.

Nan moman sa a, Claude te deja sou yon bèl elan. Li te fenk fin patisipe nan premye rantre literè kreyòl Près Nasyonal d Ayiti te òganize nan Inivèsite Karayib, nan kad Vandredi Literè.

Depi lè sa a, Claude anbake nan pwosesis pou mete AKA (Akademi Kreyòl Ayisyen) sou pye.

Claude ansanb ak Rachèle Beauvoir te ban nou bon koutmen lè n t ap mete kanpe premye Komite Inisyativ pour tabli Akademi Kreyòl la, nan mwa avril 2009. Komite sa a te gen 5 manm : Sekreteri d Eta pou Alfabetizasyon (SEA), Jounal Bon Nouvèl, Près Nasyonal d Ayiti, Konfederasyon Nasyonal Vodouyizan Ayisyen (KNVA) ak Inivesite Leta d Ayiti (UEH).

Pou m di laverite, nou te konnen sa n te vle fè a men nou pa t klè sou ki jan pou n te fè l, ki chemen pou n te pran, ki wout pou n te pase. Mwen pa bezwen di n ki kalite difikilte n te jwenn. Claude te toujou la, ap ede n chache, ap ban n konsèy, ap rale moun pou nou.

Komite a te pibliye premye nòt li nan mwa oktòb 2010. Se lè sa a li anonse yon kòlòk pou ane 2011. Nan pale ak moun k ap travay nan mouvman kreyòl la, kit se militan, kit se entelektyèl kit se lengwis, nou te fini pa wè ke si pou n vanse, fò k nou mete tout moun chita nan yon gwo woumble. Fòk nou te rive mete nou dakò sou anpil kesyon : Ki Akademi ? Eske fò k li menm jan ak Akademi franse ? Ki jan pou l òganize, ki jan pou l mache ? Ki moun ki dwe ladan l ?

LEAVE A REPLY

Please enter your comment!
Please enter your name here